മടക്കം, പക്ഷേ
...........................
കയ്യോഴിയുക
ആകാശമേ, അലകടലേ
ദൈവങ്ങളേ - വേണ്ട ,ഇനി
പിറവിയ്ക്കായ് ഒരു ജൻമം.

കണ്ണാഴിയുക
ജീവ കോടികളേ, മാമരങ്ങളേ
പൂക്കളേ
കീറിയെറിഞ്ഞതിനെ
ചേർത്തുവെയ്ക്കുന്നതെങ്ങനെ?

തൊട്ടൊഴിയുക
ജലകണങ്ങളേ, മൺതരികളേ
നിഷ്കളങ്കം
കണ്ണീരുപ്പായ് കാലം
ഇനി മടങ്ങുവതെങ്ങനെ?

കൂട്ടിന്നു വരരുത് കളിചിരികളേ
പിണക്കങ്ങളേ,പൈദാഹങ്ങളേ
അഭിനയമായിരുന്നെല്ലാം
തകർത്തുല്ലസിക്കുവാൻ.

മടങ്ങുന്നു പക്ഷേ,
ഒരിക്കൻ
ജീവനിൽ വിഷം പുരട്ടിയ
അമ്പുകോർത്തു ഞാനെത്തും
നിൻ്റെ പൊട്ടിച്ചിരിയുടെ
ലിംഗമറുക്കുവാൻ.

1.             ഗിരീഷ് മടവൂർ

അതിരുകൾ മായുമ്പോൾ
...............................................

ആരോെതാടുന്നുണ്ട് ഉറക്കം പോയ
കണ്ണിൽ, നെറുകിൽ
മണ്ണിൽ കുതിർന്ന വിരലുകൾ

വിളമ്പുന്നുണ്ട് വിശന്നലയുമ്പോൾ
പൊട്ടിയടർന്ന പാത്രത്തിൽ നിന്നും
ജീവനറ്റ കൈയുകൾ.

കാത്തിരിയ്ക്കുന്നുണ്ട് ഈ മണ്ണിനടിയിൽ
എവിടെയോ
ഒരു വിളി പാർത്ത് ഉണരാനാവാതെ
നിശ്ചലം.

തിരയുന്നുണ്ട്,ഇളം ചുണ്ടുകൾ
പകരാനാവാതെ
നെഞ്ചു നിറഞ്ഞു വിങ്ങും
സ്നേഹപ്രവാഹങ്ങൾ.

വിളിയ്ക്കുന്നുണ്ട് നേരം ചാഞ്ഞിട്ടും
കാണാനാവാതെ, വാക്കുകൾ.

എപ്പൊഴും തോൽക്കുന്നതാരോ
മറ്റുള്ളവർ ജയിക്കുന്ന തോർത്തു
കൊതിക്കുവാൻ.

കാറുമൂടുന്നു, ഇടിവെട്ടുന്നു
കരയാനാവുന്നില്ല, കണ്ണുനീർ ,
ജീവൻ തുടിയ്ക്കുന്ന താഴ്‌വരകളെ
മണ്ണിൽ പുതച്ചുറക്കിയാലോ?
                       
                             

നിൻ്റെ ഓർമയ്ക്ക്
................................
അറ്റമില്ലാത്തവയലാണ്
മുന്നിൽ
മഞ്ഞച്ച വിളഞ്ഞ പുതപ്പ്
അപ്പുറം മൺറോഡും പുഴയും
എപ്പോഴും വളഞ്ഞു പുളഞ്ഞങ്ങിനെ.

സസ്യാ വെയിൽ വയൽപ്പൂക്കൾ തുന്നുന്ന നേരമാണ് നീ വരിക

പട്ടുപാവാട ത്തുമ്പിൽ പുല്ലിൻ പൂക്കൾ പറ്റിപ്പിടിച്ചിരിയ്ക്കും
നെറ്റിയിൽ വിയർപ്പിൻ്റെ
തിളക്കം

ദൂരെ നിന്ന് അടുത്തെത്തുമ്പോൾ
രൂപം തെളിഞ്ഞു വരും
ഗന്ധകശാലയുടെ മണമായിരുന്നു നിനക്ക്

കാത്തിരുന്ന തലയ്ക്ക് മുകളിലൂടെ രാപ്പക്ഷികൾ ചേക്ക തേടും
വയൽത്തോട്ടിൽ കുളക്കോഴികൾ പാടും
കൈതകൾ പൂ വിടർത്തും
പോത്തിനേയും തെളിച്ച്
ഒരു പണിയച്ചെക്കൻ
പതിയെ നടന്നു മറയും
ആമ്പലുകൾ വിരിഞ്ഞ കുളത്തിൻ പണിക്കാരികൾ കുളിക്കാൻ വരും

രാത്രി കുറുകുമ്പോൾ
തണുപ്പിൽ
നിൻ്റെ ചിരിയിൽ
അന്തി മുല്ലകൾ വിരിയും

പതുപതുത്ത പുല്ലിൽ
മഞ്ഞിൻ കണങ്ങൾ
വിരുന്ന് കൂടാൻ വരും
തണുത്ത കാറ്റടിയ്ക്കും

ദൂരെ
പുഴയുടെ വളവിൽ
നിറയെ കത്തിനിൽക്കുന്ന
മിന്നാമിനുങ്ങുകളുള്ള
മുളങ്കൂട്ടം ഉണ്ടായിരുന്നു
പുഴയിലേക്ക് ചാഞ്ഞ മാവിൽ തേൻ കുടും

അതായിരിയ്ക്കാം
നീ പിന്നെ ഒരിക്കലും
വരാതിരുന്നത്.

മെല്ലെ ... മെല്ലെ
..............................
മെല്ലെ മെല്ലെ
നിഴലുകൾ കൂടി പിണഞ്ഞ്
ഇരുൾപരക്കും മുൻപെ

ഒച്ചകൾ ഘനമാർന്ന്
കാർന്നുതിന്നും മുൻ പെ

ക്രൗര്യങ്ങൾ പൊട്ടിത്തെറിച്ച്
ജീവെ നെടുക്കും മുൻപെ

നോട്ടങ്ങളെല്ലാം ഹൃദയം കോർത്ത്
വെളള പുതപ്പിയ്ക്കും മുൻപെ

പറന്നു തളർന്ന ചിറകുകൾ ചേക്ക തേടുംപോലെ

നോവുകൾ ഇതൾ വിടർന്ന്
പൂക്കാലമാകണം

അല്ലെങ്കിൽ
ഉണർത്താതെ നീയെന്നെ
ഉറക്കണം
നിറഞ്ഞ കണ്ണിൽ
പഴയ കഥകളുടെ ചുണ്ടമർത്തി

ആരും കാണരുത്
പുലരി തേടിപ്പോയ നിലാവിൻ്റെ കൈകളിൽ
ഒരു പക്ഷിക്കുഞ്ഞിൻ്റെ
ജഡം.
              27/2/2019

ബാക്കി
...............     
            1
വിങ്ങി വീർത്ത്
നിനക്കെഴുതാൻ കൊതിച്ച
വാക്കുകളൊക്കെ
ടൈ കെട്ടിമുഖം വീർപ്പിച്ച്
റേഡരികിൽ സ്കൂൾ ബസ്
കാത്ത്
ഒറ്റയ്ക്കു നിൽക്കുന്നു .
   
                2

ഓടി വന്ന് ആശ്വസിപ്പിക്കാൻ കൊതിച്ചു
മനസ്സിൽ നിന്ന് ഊർന്ന്
ആശുപത്രിക്കിടക്കയിൽ
ജീവൻ കുഴലുകൾ
കൂട്ടിപ്പിടിച്ച്
മടങ്ങട്ടെ...

                3
കെട്ടിപ്പിടിച്ചൊന്നു മുത്താൻ കൊതിച്ചു
ആരോ വലിച്ചു കീറിയ
പുടവക്കിടയിൽ
നഖപ്പാടുകളാൽ
സന്ധ്യ രാച്ചില്ല തേടുന്നു

                      4
കണ്ടൊന്നു കൊതിതീരാൻ
കൊതിച്ചു
ചുറ്റിലും മണ്ണെടുത്ത്
വേരുകൾ ആകാശത്താക്കി
മരിക്കാൻ വിട്ടതിനെ
ആരോ കൊണ്ടു പോയ മലയും ബാക്കിയാക്കി.
       
                 5

കൊടുക്കാൻ മറന്ന സ്നേഹം
കരഞ്ഞു കണ്ണ് തുറന്ന് വെച്ച്
മരിച്ചു
വെളിച്ചം വീണപ്പോൾ
ആരോ കൊട്ടയിലാക്കി
നിലവിളിച്ചും കൊണ്ടു നടപ്പാണ്
ചെതുമ്പലുകൾ കളഞ്ഞ്
ചെകിളപ്പുവും കണ്ണും ചൂഴ്ന്ന്
വയർ കീറി കുടൽമാല
പുറത്തിട്ടപ്പോൾ
രണ്ടു മീനുകൾ പിടയ്ക്കുന്നു.
അകത്തൊരു കടലിരമ്പുന്നുണ്ട്
കൈയിൽ സിപ്പപ്പിൻ്റെ
നിറമുള്ള മധുരത്തിരമാല.

                 6

പണ്ടു പാഞ്ഞവയൊക്കെ
ശീതീകരിച്ച സൂപ്പർ മാർക്കറ്റിൻ്റെ കോളത്തിൽ
അരികു കരിഞ്ഞു
ദിവസവും വിലക്കുറവിലുണ്ട്
കൊണ്ടുപോയി വെള്ളത്തിലിട്ടു വെച്ചു മുറിച്ചാൽ
പൊളളയോ പുഴുവോ കാണാം
അതിന് നമ്മുടെ പേരിടാം
ആരും കാണാതെ
വേയിസ്റ്റ് ബിന്നിൻ്റെ അടിയിൽ പൂഴ്ത്താം

                   7

ഈ നിറത്തിലുള്ളവയൊക്കെ
വിൽക്കാൻ വെച്ച സ്വപ്നങ്ങളാണ്
വിലയ്ക്കു വാങ്ങി വീട്ടിലെത്തിച്ചാൽ
കണ്ണുപൊട്ടിയ ചൈനീസ്
കളിപ്പാട്ടങ്ങൾ
ഒന്നിന് നിനക്കുണ്ടായതിൻ്റെയും
ഒന്നിന്
എനിക്കുണ്ടായതിൻ്റെയും
പേരിടാം.

             8

കൂട്ടിമുട്ടല്ലേ
വീടും തിരക്കാർന്ന ഹൈവേ
പഴയ വണ്ടികളാണ് നാം
ഇൻഷൂർ കിട്ടാൻ പാട്
നന്നാക്കിയാൽ ശരിയാവില്ല
പൊട്ടിയും ചുറ്റിയുo
പഴായി
ഹോൺ മുഴക്കിയില്ലെങ്കിലും
വെറുതെ വിടണേ.,,,

                    9

ലോണും പണയവുമായി
വളർന്ന വീട്ടിൽ
വൻകരകളിൽ നാമിന്നു താമസം
ഓൺലൈനിൽ കാണാറുണ്ടെങ്കിലും
വാക്കുകളില്ലാതെ
എന്തു പറയാൻ
ഓഫ് ലൈനിലേയ്ക്കു മായുമ്പോൾ
നേരിയ നോവു മാത്രം.
                   
                     10

നമുക്കു മുന്നിൽ
നന്നായി അലങ്കരിച്ച
ശീതീകരിച്ച പെട്ടി
ആരാണാദ്യം കയറുക
യാത്ര പോലും പറയാതെ
നിയോ? ഞാനോ?.
                          ഗിരീഷ് കുമാർ ഇ