തിരിച്ചു വരവ്
പലപ്പോഴും നീ തരുന്ന
മുറിവുകളിൽ നിന്ന്
ഒരാൾ ഇറങ്ങി വരാറുണ്ട്
ഇലയുടെ തണലുള്ള ഒരാൾ
ജലത്തിൻ്റെ കനിവുള്ള ഒരാൾ
ഒരു സ്ഫുലിംഗം കൊണ്ട്
ഒരു കടൽ ദഹിപ്പിക്കുന്ന ഒരാൾ
ഒരു സ്വപ്നം കൊണ്ട്
ഒരു കാടകം തീർക്കുന്ന ഒരാൾ
ആർദ്രതയുള്ള വിത്തുകൾ കൊണ്ട്
ഒരായിരം മൺ തരികളെ
പുളകം കൊള്ളിയ്ക്കുന്ന ഒരാൾ
ഒരാകാശക്കീറുകൊണ്ട്
ഒരു പൂർണ്ണചന്ദ്രനെ തീർക്കുന്ന ഒരാൾ
ഒരു മഴത്തുണ്ട് കൊണ്ട്
ജീവൻ തേടുന്ന ഒരാൾ
ഒരു ചിരി കൊണ്ട് പുലരിയും
മറ്റു ചിരിയാൽ സസ്യയുടെ
കണ്ണീരുമൊപ്പുന്ന ഒരാൾ
രാവും പകലുമെന്നില്ല
നീ തരുന്ന മുറിവുകളിൽ നിന്ന്
അയാൾ ഇറങ്ങി വരാറുണ്ട്
എപ്പോഴും .....
